МЭНДЧИЛГЭЭ
Монголын Хөлбөмбөгийн Холбоо (МХБХ)-ны Ерөнхийлөгчийн хувиас болон МХБХ-ны удирдлагын өмнөөс тус холбооны их гэр бүл, тэдгээрийн гишүүд, нийт хөлбөмбөг сонирхогчдодоо чин сэтгэлийн мэнд дэвшүүлж, та биднийг нэгэн зорилго өөд нэгдмэл сэтгэлээр хөтөлдөг дэлхийн хамгийн олон сонирхогчтой хаан спорт гэгддэг Хөлбөмбөгийн спорт Монгол Улсад улам бүр цэцэглэн хөгжихийн ерөөл өргөе!
Монголд хөлбөмбөгийн спортыг бүх нийтийн болон мэргэжлийн түвшинд хөгжүүлэх үндэс суурийг тавьсан МХБХ-г үүсгэн байгуулсан, залгамжлан өртөөлүүлж, бидний үед хүргэсэн хөлбөмбөгийн спортын үе үеийн зүтгэлтнүүд, шигшээ багийн тамирчид, дасгалжуулагчид, хөгжөөн дэмжигчиддээ гүнээ талархаж байна.
Хөлбөмбөгийн спорт бол хүн төрөлхтнийг хил хязгаар, хэл соёлын ялгаагүйгээр сэтгэл зүрхээр нь нэгтгэдэг гайхамшигт спорт билээ. Энэхүү гайхамшигт спортыг мэргэжлийн түвшинд хүргэх, хөгжлийн гурвалжингийн суурь болсон нийтийн хөлбөмбөг түүний дотор өсвөрийн хөлбөмбөгийн хөгжлийг шинэ шатанд гаргах чухал зорилт бидний өмнө байна.
Иймд МХБХ-ны Ерөнхийлөгчийн хувиар шигшээ баг, мэргэжлийн хөлбөмбөг, эмэгтэй хөлбөмбөг, футзал, клуб болон гишүүн байгууллагууд, дасгалжуулагчийн боловсрол, дэд бүтэц зэрэгт анхаарахаас гадна нийтийн хөлбөмбөг түүний дотор өсвөрийн хөлбөмбөгт түлхүү анхаарахаа илэрхийлж, энэхүү зорилтыг биелүүлэхэд бүхий л ур чадвар, хичээл зүтгэл , олон улсын туршлага, хамтын ажиллагаа, бүтээлч шүүмжлэл, эв нэгдлийг баримтлан нэн тэргүүний зорилт болгон ажиллахаа илэрхийлж байна. МХБХ-ны ээлжит XII их хурлаар холбооныхоо Ерөнхийлөгчид нэр дэвших үед танилцуулсан мөрийн хөтөлбөрөө (мөрийн хөтөлбөрийн холбоосоо энд идэвхжүүлэх) бодит ажил болгохын төлөө хичээн зүтгэх болно. Монгол улсад Хөлбөмбөгийн спорт мандан бадрах болтугай.
